കൊച്ചി: റെയിൽവേയുടെ അധീനതയിലുള്ള പ്രധാന ഡ്രെയിനേജ് കനാൽ ശുചീകരിക്കാത്തതിനെ തുടർന്ന് എറണാകുളം KSRTC ബസ് സ്റ്റാൻഡ് യാർഡ് പൂർണ്ണമായും വെള്ളപ്പൊക്ക ദുരിതത്തിലായി. കാലവർഷത്തിന് മുന്നോടിയായി നടത്തേണ്ടിയിരുന്ന തോട് വൃത്തിയാക്കലും എക്കൽ നീക്കലും സതേൺ റെയിൽവേ അധികൃതർ പൂർണ്ണമായി അവഗണിച്ചതാണ് ആയിരക്കണക്കിന് യാത്രക്കാരെയും ജീവനക്കാരെയും ദുരിതത്തിലാക്കിയത്.
ബസ് സ്റ്റാൻഡിനോട് ചേർന്ന് കിടക്കുന്ന റെയിൽവേ കനാൽ കാട്ടുചെടികളും പ്ലാസ്റ്റിക് മാലിന്യങ്ങളും അടിഞ്ഞുകൂടി പൂർണ്ണമായും അടഞ്ഞ നിലയിലാണ്. ഇതുമൂലം ഒഴുക്ക് തടസ്സപ്പെട്ട് മഴവെള്ളം ശക്തമായി പിന്നോട്ട് അടിച്ച് പുതുതായി നവീകരിച്ച ബസ് ബേ ഉൾപ്പെടെ വെള്ളത്തിനടിയിലായി.
എം.എൽ.എ ഫണ്ടും കോർപ്പറേറ്റ് സോഷ്യൽ റെസ്പോൺസിബിലിറ്റി (CSR) ഫണ്ടും ഉൾപ്പെടെ ആകെ 1.88 കോടി രൂപ ചിലവഴിച്ച് യാർഡിന്റെ ഉയരം കൂട്ടി ശാസ്ത്രീയമായ ഡ്രെയിനേജ് സംവിധാനം ഒരുക്കിയിരുന്നു. എന്നാൽ പുറത്തേക്കുള്ള റെയിൽവേ കനാൽ അടഞ്ഞുകിടക്കുമ്പോൾ ഉള്ളിൽ നടത്തിയ നവീകരണങ്ങൾ പൂർണ്ണമായും പരാജയപ്പെടുകയും പൊതുപണം പാഴാകുകയും ചെയ്തുവെന്ന് ആം ആദ്മി പാർട്ടി എറണാകുളം ജില്ലാ സെക്രട്ടറി സുജിത് സുകുമാരൻ ആരോപിച്ചു.
സ്ഥിതിഗതികൾ ഗുരുതരമായി തുടരുന്ന സാഹചര്യത്തിൽ, കൊച്ചി കോർപ്പറേഷൻ മേയർ മുൻകൈയെടുത്ത് റെയിൽവേ, കെ.എസ്.ആർ.ടി.സി, ഇറിഗേഷൻ വകുപ്പ് തുടങ്ങിയ വിവിധ വകുപ്പുകളുടെ അടിയന്തര ഏകോപനം ഉറപ്പാക്കണമെന്ന് ആം ആദ്മി പാർട്ടി ആവശ്യപ്പെട്ടു.
അടിയന്തര ആവശ്യങ്ങൾ:
- മേയറുടെ നേതൃത്വത്തിലുള്ള വകുപ്പുതല ഏകോപനം: കൊച്ചി കോർപ്പറേഷൻ മേയർ അടിയന്തരമായി ഇടപെട്ട് സതേൺ റെയിൽവേ അധികൃതരുമായും കെ.എസ്.ആർ.ടി.സിയുമായും സംയുക്ത മീറ്റിംഗ് വിളിച്ച് ചേർക്കുകയും വെള്ളപ്പൊക്കത്തിന് ശാശ്വത പരിഹാരം കാണാൻ ആവശ്യമായ ഏകോപനം ഉറപ്പാക്കുകയും വേണം.
- റെയിൽവേയുടെ അടിയന്തര ശുചീകരണം: സതേൺ റെയിൽവേ എൻജിനീയറിങ് വിഭാഗം അടിയന്തരമായി യന്ത്രസാമഗ്രികൾ വിന്യസിച്ച് കനാലിലെ തടസ്സങ്ങൾ നീക്കണം.
- അക്കൗണ്ടബിലിറ്റി ഓഡിറ്റ്: പുറത്തെ കനാലിലെ തടസ്സം കണക്കിലെടുക്കാതെ 1.88 കോടിയുടെ പദ്ധതി നടപ്പിലാക്കിയതിലെ അശാസ്ത്രീയതയെക്കുറിച്ച് അന്വേഷണം നടത്തണം.
സുജിത് സി. സുകുമാരൻ
സെക്രട്ടറി – എറണാകുളം ജില്ല, ആം ആദ്മി പാർട്ടി