എറണാകുളം, 06 ജൂൺ 2026: എറണാകുളം നഗരത്തിന്റെ ഹൃദയഭാഗമായ കെ.എസ്.ആർ.ടി.സി ബസ് സ്റ്റാൻഡും പരിസര പ്രദേശങ്ങളും നേരിയ മഴയിൽപ്പോലും പൂർണ്ണമായി വെള്ളത്തിനടിയിലാകുന്ന സാഹചര്യത്തിൽ ബന്ധപ്പെട്ട വകുപ്പുകൾ അടിയന്തരമായി ഇടപെടണമെന്ന് ആം ആദ്മി പാർട്ടി ആവശ്യപ്പെട്ടു. ശാസ്ത്രീയമല്ലാത്ത ഡ്രെയിനേജ് സംവിധാനവും കനാലുകളുടെ നവീകരണത്തിലെ അനാസ്ഥയുമാണ് ജനങ്ങളെ ദുരിതത്തിലാക്കുന്നതെന്ന് എഎപി തൃപ്പൂണിത്തുറ മണ്ഡലം കോർഡിനേറ്റർ അത്തീക്ക് സേട്ട് വാർത്താക്കുറിപ്പിൽ അറിയിച്ചു.
പൊതുജനങ്ങളെയും യാത്രക്കാരെയും ഒരുപോലെ ബുദ്ധിമുട്ടിക്കുന്ന ഈ പ്രശ്നത്തിൽ ജില്ലാ കളക്ടറും കോർപ്പറേഷൻ അധികൃതരും താഴെ പറയുന്ന കാര്യങ്ങളിൽ അടിയന്തര നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു:
- അടിയന്തര ചെളി നീക്കൽ (Desilting): മുല്ലശ്ശേരി കനാൽ റോഡ്, കാരിക്കമുറി റോഡ്, സൗത്ത് റെയിൽവേ സ്റ്റേഷൻ റോഡ്, കൂടാതെ കെ.എസ്.ആർ.ടി.സി മുതൽ പാർക്ക് റോഡ് വരെയുള്ള പ്രധാന റോഡുകളിലെ കാനകളിലെയും ഡ്രെയിനേജ് സംവിധാനങ്ങളിലെയും ചെളിയും മാലിന്യങ്ങളും യുദ്ധകാലാടിസ്ഥാനത്തിൽ നീക്കം ചെയ്യുക.
- റോഡ് നിർമ്മാണത്തിലെ അഴിമതി അന്വേഷിക്കുക: കഴിഞ്ഞ രണ്ട് വർഷത്തിനുള്ളിൽ ഈ പ്രദേശങ്ങളിൽ നിർമ്മിച്ച റോഡുകൾ പലതും ഇതിനോടകം തകർന്നു കഴിഞ്ഞു. ഇതിൽ വ്യാപകമായ അഴിമതിയും വെട്ടിപ്പും നടന്നിട്ടുണ്ടെന്ന് സംശയിക്കേണ്ടിയിരിക്കുന്നു. അതിനാൽ ഈ റോഡുകളുടെ നിർമ്മാണ നിലവാരം പുനഃപരിശോധിക്കാനും കുറ്റക്കാർക്കെതിരെ കർശന നടപടിയെടുക്കാനും ഉത്തരവിടണം.
- മുല്ലശ്ശേരി കനാൽ നവീകരണം പൂർത്തിയാക്കുക: കഴിഞ്ഞ 10 വർഷമായി ഇഴഞ്ഞുനീങ്ങുന്ന മുല്ലശ്ശേരി കനാൽ നവീകരണത്തിലെ സാങ്കേതികവും ഭരണപരവുമായ തടസ്സങ്ങൾ പരിഹരിച്ച്, അടിയന്തരമായി പണി പൂർത്തിയാക്കാൻ നടപടി സ്വീകരിക്കുക.
- പുതിയ കനാൽ നിർമ്മിക്കുക: റെയിൽവേ ലൈനിന് സമാന്തരമായി ആവശ്യത്തിന് വീതിയുള്ള ഒരു പുതിയ കനാൽ നിർമ്മിച്ച്, അത് പാർക്ക് അവന്യൂ കനാലിലേക്ക് ബന്ധിപ്പിക്കാനുള്ള സ്ഥിരമായ ഒരു പദ്ധതി തയ്യാറാക്കുക.
ഈ വഷളായ സാഹചര്യം ഉടൻ പരിഹരിച്ചില്ലെങ്കിൽ വരും ദിവസങ്ങളിൽ നഗരത്തിലെ വെള്ളക്കെട്ട് കൂടുതൽ രൂക്ഷമാകുകയും ജനജീവിതം പൂർണ്ണമായി സ്തംഭിക്കുകയും ചെയ്യും. അതിനാൽ അധികൃതരുടെ ഭാഗത്തുനിന്ന് ദ്രുതഗതിയിലുള്ള ഇടപെടൽ ഉണ്ടാകണമെന്നും അത്തീക്ക് സേട്ട് വ്യക്തമാക്കി.
കൂടുതൽ വിവരങ്ങൾക്ക്:
അത്തീക്ക് സേട്ട്
കോർഡിനേറ്റർ, ആം ആദ്മി പാർട്ടി
തൃപ്പൂണിത്തുറ മണ്ഡലം.
ഫോൺ: +91 94004 61220
